Gleðilegt sumar !!

Merkilegt að halda upp á sumardaginn fyrsta í byrjun páskahelgarinnar. Finnst að páskarnir eigi að vera löngu búnir  Af hverju ætli það sé ekki föst dagsetning á þeim eins og jólunum? Það væri mun hentugra - fyrir mig a.m.k

Hér er þetta dæmigerða fyrsta sumardags veður - rok og rigning

Annars man ég að stundum hafa komið góðir fyrstu sumardagar, þótt yfirleitt hafi ég ekki gert neitt sérlega mikið með þennan merkisdag annað en að gefa börnunum sumargjafir (yfirleitt útidót þegar þau voru yngri en seinna fengu þau strigaskó) og hafa pönnukökur með kaffinu. Mér er þó sérstaklega minnisstæður einn sumardagurinn fyrsti, eða reyndar var það nú sumardagurinn annar  sem stendur upp úr. Ætli ég hafi ekki verið 6 ára. Og það var yndislegt veður þessa vordaga í apríllok 1966. Og ég fékk lítinn traktor í sumargjöf. Þetta var besta sumargjöf sem ég man eftir að hafa fengið. Hvað um það - traktorinn gleymdist úti í garði um kvöldið þegar ég fór að sofa. Ég var ákaflega árrisult barn og þegar ég vaknaði þennan annan sumardag mundi ég að traktorinn minn hafði orðið eftir úti kvöldið áður. Ég varð hreint miður mín og rauk út á náttfötunum að sækja traktorinn minn. Ég man það enn hvað grasið var rakt og góð lykt í loftinu og hvað ég varð glöð þegar ég fann traktorinn minn. En þegar ég ætlaði með hann inn uppgötvaði ég að útidyrnar höfðu lokast á eftir mér og ég var læst úti. Á náttkjólnum  Svo ég hringdi dyrabjöllunni. Ég gleymi aldrei svipnum á pabba þegar hann kom til dyra og fyrir utan stóð einkadóttirin á náttkjólnum með traktorinn sinn í hendinni  - klukkan hálfsjö

Já þetta er dagur barnanna. Gleðilegt sumar

Athugasemdir

[Sigrún Jónsdóttir, 21.4.2011 kl. 16:14]

Skemmtileg mynning  Gleðilegt sumar

[Jónína Dúadóttir, 21.4.2011 kl. 16:34]

Yndislegt... sé litlu dúlluna fyrir mér og líka svipinn á pabbanum

Gleðilegt sumar

[Dagný, 21.4.2011 kl. 23:09]

Takk stúlkur mínar - þetta er ein af mínum bjartari minningum

[Jóna Kolbrún Garðarsdóttir, 22.4.2011 kl. 01:42]